أنا بالبلدى

in Arabic بالعربى أنا مبقدرش اقدم نفسى كويس او أعرضها صح .. و بالذات بالعربى مش عارف ليه ... تلاقى دخل عامية على فصحى و الدنيا بتبوظ ... و ديه حقيقة و معلومة عنى .... أنا مبعرفش أكلم كويس ... و لما ببتدى الكلام الأفكار بتهرب منى و أفضل أنط من فكرة لفكرة .. عشان كده أنا بتهيألى بحب الكتابة .. بالذات عشان فيه الحرف اللى بحمد ربنا عليه " delete" ... بيدينى فرصة أرتب أفكارى و أصلح الكلام و أظبطه قبل "النشر" .. آملا فى يوم من الأيام إن الكتابة تحل محل الكلام كوسيلة تواصل ^_^ "ده المفروض وش بيضحك" ... أنا عمرو .. بحب إسمى جدا على الرغم من إنى معرفش معناه "سيبك من النظريات بتاعت عمران و الكلام ده ^_^" .. "زى حاجات كتيرة فى حياتى بحبها و مش عارف ليه ... و فى حياة أى واحد ... بتهيألى الإنسان بيتولد بيها ... كل واحد و ليه السى فى بتاعه ... أنا هحب اللون الأزرق .. أنا هحب موسيقى البوب ... أنا هحب الشخص الفلانى ... أنا هحب الفراولة .. الحاجات ديه كلها .. انتا مولود بيها .. " ,,, بس بتهيألى أنا بحبه عشان بسيط ... 3 حروف سيبك من الواو .. زى جون أو جو أو آرن .. أنا عمرو .. عمرو و بس .. و ده أنا ... * أنا مسلم ديه هويتى و شخصيتى و كيانى أو بالأحرى اللى أنا عاوز أوصله و أبقاه ... أنا مش سنى ... أنا مش شيعى .. أنا مش صوفى ... أنا مش سلفى .. أنا مش اخوانى .. أنا مش تحريرى ... و مبنتميش لأى تيار ( ديموقراطى , إشتراكى , شيوعى , يسارى , ليبرالى , ... الخ ) ... أنا مسلم مسلم و بس و بحاول دايما إنى أطبق الإسلام زى مأنا فهمه على حياتى ... فى كل حاجة فيها .. الإسلام دين عام .. دين حياة بيوجه و يرشد فى مختلف النواحى .. بيدى الإطار العام اللى ينفع يطبق ف كل زمان و مكان .. و إحنا نتصرف فى إطاره * أنا أؤمن و أعتقد ف الحب و إنه لازم يبقى هوا ده الشعور العام اللى يجمعنا كلنا و اللى ممكن المشاكل تتحل عن طريقه الحب هو الى يجمعنا كلنا عشان كده أنا بحب ربنا .. و علاقتى به علاقى حب .. و عشان كده أنا بحب الناس كلها ( يهود و هندوس و مسيحيين و ... الخ ) كل الناس .. و هقتبس هنا جملة من فيلم و اللى أنا بعتقد فيها بعمق و بقسم الناس عليها " الناس نوعين : كويس و وحش " أنا بضيف عليها "و الوحش ده كمان ممكن ببقى كويس " ... * أنا مبعتقدش ف الأشخاص مبتبعش أى حد معين بسمع لأفكار ده و ده و بعرضها على دماغى و بؤمن و أثق فىسى و فى اللى قلبى و عقلى اتفقوا على إختياره .. عشان كده كل أفكارى و آرائى و أفعالى عمرو .. كلها أنا ... *أنا بؤمن بالإختلاف أنا مختلف و كلنا مختلفين مع بعض و احنا لازم نتعايش و نتقبل اختلافتنا و بؤمن إن التغير هو سنة الحياة ... * صعب جدا إنك تبهرنى صعب أوى إنى أبقى مخطوف أو مبهور بفعل حد .. بتهيألى عشان قريت كتير ف التاريخ .. فعارف نماذج من البشرية ممكن أه تتكرر بس عمر مفى حد هيسبقها * أنا بكره الكدب بحب الصدق و الصراحة .. أحب الإنسان يبقى على طبيعته .. بكره التزيين .. و حوار " إنى لا أكذب و لكنى أتجمل " .. يا سلام لو الإنسان يتصرف على سجيته على أصله على طبيعته .. إنك تكون نفسك .. مبحبش اللى بيمثل إنه شخص تانى .. على الرغم من إنى بعمل ساعات كده بس بحاول أقلل ده على أد مقدر بحيث إنه ميعديش 10 % من حياتى و فى ال10 % دول ديه الفترة اللى بكره فيها نفسى .. * أنا بؤمن إنى إنسان و معنى إنى إنسان إنى أتعامل كإنسان .. كبشر و إنى أعامل الغير كبشر .. أنا عندى حاجات وحشة كتيرة لأنى أنا إنسان .. عشان كدة ... * أنا مش كامل و مفيش حد كامل مبحبش إنى أكلم عن شخص كأنه بقى إله و منزه عن أى شىء حتى لو الشخص ده عالم أو شيخ يظل فى نظرى مش كامل و إنسان .. أنا أحترم الفكرة اللى هوا شايلها و أعرف إن فيه جانب كويس و أكيد فيه جانب وحش .. أنا بعتقد إننا المفروض نركز على الجانب الكويس اللى موجود فينا و فى غيرنا و نبعد عن الجنب الوحش و إننا نقيم و نمدح و نشكر الحاجات الكويسة اللى فى غيرنا .. مش نعيش حالة من إننا نلوم بعض و نحكم على بعض و نصلح فى بعض .. ننصح .. و النصيحة زى عرض يتاخد أو يتساب .. ده مسؤوليتك .. بس متجيش تقرفنى بإنك تفضل تحاول تفهمنى أو تحكم عليا أو تصلحنى ... *أنا محبش أحكم ع الغير عشان أنا مبحبش حد يحكم عليا أو يحكم على أفعالى .. إلا طبعا لو أفعالى دبة متعلقة بأشخاص تانيين .. ساعتهت نكلم مع بعض عليها .. غير كده " إنتا مالك بيا " ... * أنا حاسس بيك .. بحس بالمعنى أوى .. باللى إنتا بتقوله و ده اللى أنا حاسس هيا القدرة الخارقة بتاعتى ..^_^ إنى بقدر أحس بيك بقدر أعكسلك نفسك ممكن مقدرش أحللك مشاكلك بس هحاول دايما أرسملك طريق .. أو أفتحلك باب .. *هواياتى أو انا بحب إيه ( قراءة - إنى أدرس الناس - الأفلام - الكتابة - التصوير - الموسيقى - إنى أعزف جيتار فى الهوا ^_^ _ و إنى أعمل حركات متخلفة و أسميها هيب هوب ^_^ طبعا ديه أنشطة الإنعزال ^_^ " و حجات تانية كتير بس دول أهم حاجة ... * سعادتى المطلقة إنى أعيش الجنب الكويس ف الناس الحاجات الحلوة اللى فيهم إنى أشوف و أسمع و ألمس و أحس بالجمال اللى جوة الناس بجد ده اللى بيهون عليا الحياة و سخافاتهم .. جمال و روعة الناس .. أكتر حاجة تسحرك و تسرق عقلك و متعة الحياة الحاجات الجميلة اللى جوانا لما الواحد يوصل للحاجات ديه فى الناس ااه ه ه .. بجد سعادة مطلقة :) .. * أنا بحب الموسيقى بكل أنواعها لو هبا حاوة بوب و روك و كلاسيك و هيب هوب و ميتال و .... الخ أنا بحب أكون و إمنيم و بلو و وست لايف و باك ستريت و مايلى و أكسنت و أليشا و بنك و بوسى كاتس و كات ستيفنس و بلاك إيد بييز و ستنج و ..... الخ و بحب أم كلثوم و نجاة و تامر و عمرو دياب و حماقى و منير و فيروز و فريق أسفلت و الزيرو و أرابيك نايتس و مكى و وسط البلد و فؤاد و إليسا و جنات و .... الخ أنا شايف إن كل واحد و كل نوع ليه طعم و ليه مذاق مختلف عن التانى و كل واحد "حالة " مختلفة و بيعمل دماغ مختلفة بس أكتر لون بحبه هوا الراب عشان بيعتمد أساسا ع الكلمات معبر جدا عن المجتمع و فيه معانى كتيرة و بيعكس الدنيا مش بس كلام عن حب و فراق و بس لأ تقريبا عن كل حاجة ف الحياة .. أحلى فريق عندى كولد بلاى و أحلى أغنية لفريق " تايم تو برتند " لفريق اسمه مجمت و أحلى مغنى أكون و أحلى أغنية لمغنى هيا بيرس مارك و أحلى مغنيى مايلى و أحلى أغنية " أى ول ألويز لاف يو " لوايت أوستن و أحسن فريق أسفلت و أحسن أغنية لفريق " قلبى بيناديكى " لأحمد الفيشاوى و أرابيان نايتس و أحسن مغنى حماقى و أحلى أغنية " بين إديك " لمحمد فؤاد و أحلى مغنية إليسا و أحلى أغنية لمغنية " ألف ليلة و ليلة" لأم كلثوم .. مبحبش أنغام و لا راغب علامة و لا كاظم الساهر و لا أفريل و لا مادونا .. أنا حاسس إنى كنت بقول إستفتاء العام ^_^ * القراية أنا بحب أقرا ... تاريخ , أدب , خيال علمى , دين , فلسفة , سياسة .... أنا بسافر عن طريق الكتاب .. أنا بشتغل رائد فضاء عن طريق الكتاب .. أنا بقاوم الإبولا فى بلد أفريقية ,,, بنسى الناس و اللى حواليا و ببقى هناك بس تقريبا دلوقتى معظم القرايات استبدلت بالأفلام و الإنترنت بمقالات أو فيديوهات ... أكتر كاتب بحبه " على أحمد باكثير" و أحسن كاتب من برة " ج.ك.رولنج * أنا بحب الأفلام جدا طبعا أتفرج .. للأسف أنا متفرجتش على أفلام عربى كتير بس كتير أجنبى .. أنا بحب كل الأنواع ما عدا الرعب و الأكشن الصرف .. بس برده بتفرج عليهم .. أحسن أفلام بتفرج عليها و بحبها الروم كوم و الأفلام الملهمة و أفلام الرياضة و الخيال العلمى و التاريخى و الكوميدى .... مبحبش المسلسلات عشان بمل بسرعة ما عدا إتنين شدونى للآخر " البخيل و أنا " و " بريزون بريك" .. بس أفتكر مسلسلات حلوة زى " سارة و الأبطال و ليالى الحلمية و برن نوتيس " .. الأفلام الكويسة كتير بس دول أكتر حاجة تقريبا http://www.imdb.com/mymovies/list? l=45904769 بتهيألى أحلى فيلم أجنبى إتفرجت عليه كان " باتش آدمز" لروبين وليامز و أحلى فيلم عربى إتفرجت عليه كان سهر الليالى و زى النهاردة .. و أحلى ممثل أحمد حلمى و أحلى ممثل أجنبى توم هانكس و أحلى ممثلة كريمة مختار و أحلى ممثلة ميج ريان .. * بحب التصوير أوى بحس كده إنه زى إبداع .. انتا بتبدع برؤيتك .. كأنك بترسم بس بعنيك لسه على موبايل بس إن شاء الله أنقل على كاميرا قريب .. بحب أتمشى كدة فى أى حتة و أفضل أصور * بحب السفر .. أنا مولود مسافر .. مليش بيت .. العالم ده كله هوا بيتى .. أنا بفضل التنطيط و السفر عن الإستقرار و الكلام ده .. إنى أسافر و ألف مصر و بعد كدة العالم و أتعرف على أشخاص مختلفة و ثقافات و بتاع .. أنا بحب السفر عشان السفر يبقى سفر سياحة مش سفر شغل و للعلم و كدة .. سفر للسفر ... *أنا بحب الكتابة شعر و راب و مقالات .. أى حاجة بتعبر عن مشاعر .. أنا متخيل إن الكلمات قاعدة تنط ف دماغى عاوزة تخرج برة .. عاوزة تعلن وجودها على ورقة على موبيل على كومبيوتر أهم حاجة تطلع .. فمهما كان رأيك ف اللى أنا بكتبه .. و لو كان حتى مقرف و ممل .. أنا بكتب لنفسى فى الأول..و مش لحد معين .. بكتب للى حاسس إن الكلمات المكتوبة تتوافق و ماشية مع اللى حاسس و بيفكر فيه .. و حاسس إنها لمست حاجة جواه ... بس طبعا أكيد رأيك يهمنى و محل تقدير و إحترام *أنا مبفهمش ف الرياضة أوى و مش مهتم بس أنا زمالكاوى و بشجع المصرى البورسعيدى و بعرف حاجات و بقرا و مسمع عشان بس أواكب الدنيا و كدة بس مثلا لو لغوا الكورة أو أنا صحيت فى يوم لقتهم شالوا كلمة كورة من القاموس معنديش أى مشكلة * أنا بحب العزلة و الوحدة جدا أحب أعود أو أعوض يعنى أجلس ^_^ مع نفسى و أسمع لنفسى و أفكر بحس إن دماغى شغالة كل ثانية .. أنا مبحبش الدوشة و مبحبش العلاقات و المجتمع و التواصلات * أنا أؤمن إن أى واحد يقدر يعمل أى حاجة .. إحنا اللى بنحط عوائق و موانع لنفسنا .. عشان كدة الناس تحس ساعات إنى مجنون .. و أنا بحاول بكل إمكان إنى أخلي الجنون عقلانى بقدر الإمكان ^_^ ... * أنا بحب بلدى بورسعيد أوى و نفسى فى يوم أقدر أعملها حاجة كويسة * أنا بحب البحر و السباحة و ساعات بتمنى إن إحنا الوسط بتاعنا مش هوا و يبقى مية .. مبقدرش أقاوم أى مسطح مائى ببقى نفسى أنط فيه وقعنى هناك و سيبنى .. * أنا ممكن أكون زعلان و فى الثانية اللى بعدها فرحان كل حاجة ليها سبب بس انتا مش لازم تعرف السبب مش مفروض عليا أمسك كل واحد و أقوله إيع .. تعامل مع الشعور كما هوا ... *بموت فى الحساب مع إن نسيته كله تقريبا بس أنا حاسس إنه مستخبى جوايا ولما أهزه هيصحى .. * بحب كل الناس و فخور إنى عربى و مصرى * بحب جدا الطب النفسناوى ^_^ * فى الآخر ده أنا ميهمنيش رأيك فيا أنا بحب نفسى كدة بس طقت فى دماغى أنى أقدم نفسى فى ملخص بسيط زى بتع المتشا كدة و أبص على العك اللى هيطلع .. ,,,